MON PAVTA PUNN HAT PAVONANT - Fausto V. Da Costa

MON PAVTA PUNN HAT PAVONANT


ANIK ek voros sompta. The Goan Review nemallem jivem asa. Koxem kat te vixim
vicharnakat. Fuddlea vorsant kitem zatlem hem vicharnakat. Punn fuddlo
Jan-Feb'05 ank uzvaddak haddpachjo nirnnoi ghetla. Itlench khatren sangum
ieta.
Hem amchem-tumchem nemallem 16vea vorsant ttanch marta. Oddchonneank fuddo
korit tem chol'lem. Tin vorsam fattim ami tem bondh korpak nirnnoi ghetlolo
ten'na tem chalu dovorchem mhonn GRAF sonsthechea vangddeamni hot dhorlo ani
arthik mozot bhasaili mhonnunuch tem anik tin vorsam sarunk xoklem. Tech
porim kaim Konknni mogeamni tem jivem dovorpak agro korun eka anka khatir 7
hozar rupia 'sponsorship' diun tin ank kaddpak mozot keli. Oxench heram-i
G.R.-achea bore-dekhpeanchea sohokarak lagun tem aiz meren tumchea hatant
poddlam. Somestanche ami abar mandtanv.
Atam amche prosn dupett zaleat. Arthik poristhiti bori na ti na, tantun atam
uzvaddavpacho vavr vaddtta ani sogllo karbhar ekleacheach khandar poddtta,
karann ho vavr pollovpak Mumboint monis mellpak muskil zalam. Xivai, favo
tosle ani favo title borovpi nant. Atam tori Gulab-achea kaim borovpeamni
aplim moladik borovpam G.R.-ak divpak survat kel'lean amchem vojem matxe
lohu zalam.
Vachpeancho ankddo tor choddona, urfattem zalear dhenvot asa. Favo titleo
jahirati mellnant. Jahirati mellop muskil zalam. Hea osli poristhiti ievpak
karannam astelinch. Jerul karannam asat hem ami maneo kortanv. Punn he-ui
prosn suttave korpacho-i vavr magir ekleachoch nhoi? Sonstha legun tumchea
fattlean asot zalear ti fokot nanvak, ani sol'lo divpak.
Sol'lo! Oi sol'lo tor sogott ditat. Sol'lo divop mhonnchem ek sompem kam'
zalam. Sol'lo divpak duddu lagonant. Aiz ekuch vostu sovai asa ani tichem
mol choddona, ani ti vost mhollear sol'lo. Punn dil'lo sol'lo vevharant
ghalpak khas sol'lo divpea lagim sud'da ghoddona. Mhunnttoch sol'lo diun
koslo faido? Tantun prosn suttave zainant, bogor prosn vaddttat.
Atam Gulab mhoinalleachem sompadponn hatant ghetlelean vavra borobor
zababdareo ani sangata ttennxionam vaddleant. Gulab-acho kharbhar tatpurto
khoro, punn je meren hem mhoinallem novea uzvaddavpi-sompadpea hatant dium
meren to pormollit korunk naka? Gulab, Goenche Arki-diosezichea tabeant
korpa vixim sonvad chalu asa te meren to cholovpacho vavr pollovpachi amchi
fikir.
"Goencho Avaz" survatek disallem ani uprant satollem koxem uzvaddak ietalem
ani fattim tem Konknni Sahiteacho Pormollit Jhelo mhonn masik rupan vorsak
dondam sorv sorgest Fr. Freddy J. da Costa ani Felicio Cardoso uzvaddak
haddttale. Tacho fuddlo ank uzvaddak haddina zalear tachem 'Registration'
zopt zatlem. Mhunnttoch 'Goencho Avaz' uzvaddaunk konnachi-i itsa aslear
tannim amkam kolloum ieta. He vixim Dalgado Konknni Akademiche sahitik
somitichea fuddareak ami e-mail patthoila. DKA ek varxik masik uzvaddaunk
sodhta mhunnttoch tannim 'Goencho Avaz' hachea rupan hem masik sahitik jhelo
koso dor vorsak uzvaddaum ieta.Ami sol'lo diunk sodhinant, bogor ek suchnna
kortat. Ani zori DKA vo her konnui hem masik uzvaddaunk toiar asot zalear
tankam amche tanki pormonnem sogllo sohokar diunk ami raji asanv. Hem-ui
masik jivem uronk amchi itsa asa.
Voir dakhoil'leam karannank lagon vavr dupett zala. 'Goan Review' odik
pormollit korcho oxem amkam-i dista. Dubav na to pormollit korpak amchi
sogli tozvit chalu asa. Tori to anikui pormollit korpak xokea asa hem ami
mandun ghetanv. Ani toxem korpak amchi itsa bi asa, punn mon ani chintnam
pavtat, punn hat pavonant mhonnttat tosli amchi got zalea.