Tiatr Dis sorombho - 115 Vorsam somptana

Another ‘Tiatr Day’ With Very Poor Attendance

Mogall Joe Bab,

Tunvem voilo mathalo diun, Abrilache 19ver Brestara
disa, NRI-GOANs wed-site potr veharant ‘Kala
Academy’-n ghoddun haddlolo “Tiatr Dis” sorombacbo
vako (report) uzvaddak haddlolo to, ami mon diun
vachlo. Konknni bhaxecho, Goencho ani Goenchea
sonskruticho tuka bhouch mog asa mhonn tujea vavra
velean amkam sid’dh zata. Pordesan aslelea Goenkarank
tujea koddlean bhouch faideachem vachop ani fotu soit
video velean chitram melltat. Tuzo moladik vell
piddear korun Goenkaranchea moga khatir khitem tori
mothvachem dita. Tuji tust korta titlich thoddi zait.
Isvoracho axirvadd tujea vavracher magtam.

Chalu vorsak, Abril 17ver ‘Kala Academy’-n sat
Goenchea tiatristancho sotkar kelo. Hantle dog kolakar
goir-hajir (absent) asle mhonn tujea borovpan vachunk
melltta. Julio Rodrigues (Jr. Rod) aplea sorgest bapui
Minguel Rod-ak, Goenchea sorkaran azun pasun bhovmann
(honoured) diunk na mhunn, nixedh porgottun, ‘Kala
Academy’-chea sorombhak hajir zai nastanam ravlo.
Dusro kolakar, Brazinho Soares-Kulapurkar, Kuwait-an
teach disa (Abrilachea 17ver) Kuwait-Goa Tiatristanchi
Sonvsthen (KGTS) 115 vorsam ‘Tiatr Dis’ ghoddun
haddlolea sorombhak hajir aslo ani tech porim “Konknni
Oparincho Jhelo” tachea novea pustokachem ugttavnni
pordesant korchea khatir KGTS hannim, taka khas
amontron diun Kuwait haddlolo.

‘Tiatr Dis’ mhonntoch, Kala Academy-cho sobhaghor
(auditorium), tiatristanim bhorun votunk zai aslem.
Durdovean, fokot hatar mezpa sarkele tiatrist thoim
distale mhonn tujea borovpan vachlem. Hi ek vhodd
khonttichi gozal. Thoddeank soddlear, zaitea
tiatristanim Konknni rong-machi aplo pottacho dhonddo
kela. Tor he tiatrist tea disa khoim asle kai?

Abrilache 17ver KGTS-an, eka farak tin xikar marli.
Tiatrachim 115 vorsam sorombh ‘Tiatr Dis’, KGTS
ghoddun haddlear panchvem voros (5th anniversary) ani
Bab Brazinho Soares-chea “KONKNNI OPARINCHO JHELO’
pustokachi ugtavnni.

Sorombhak hajir zaunk, Sonvsthe-cho, sorv-chitnis
umedivont bab Domnic Araujo hannem, mhojea oslea lhan
kirkoll borovpeak, amontron kard dilem. Sanjechea 7:30
horar, Village Inn Restaurant-ant voilo dhobazo
sorombhcho aslo. Kuwait-an, xeboram odik, vhodd ani
lhan (professional/amateur) tiatrist thikann korun
aslelean, hea dhobajeak Village Inn vosreant famili
sangata tiatristanchi ghorddi zatli mhonn chintun,
hanv vegim thoim pavon sorlear, ‘Hanv gel’lom axen,
sermanv zalo firngi bhaxen’ osli ghoxtt mhoji zali.

Bab Brazinho hanchi borovpam, hanv iskolacho lhan
por astanam Konknni disalear, satolear, ani masikar
vachtalom. Tannem, adlea tiatrachim hand bill-am (1947
thavn) ani pustokam (1954 savn) zoma korun aplea
ghorant samballun dovorleant mhonn kaim pavtti Inglez
toxench Konknni potrancher hanvem vachlelem. Ani
halinch KGTS hannim, tanchea vorsavollichea choutea
songit “Konknni Machiechi Itihas” karriavolli disa,
Kuwait-Hawally Sobhaghorant Bab Brazinho-an
ekttavlelim tiratrachim hand bill-achem prodoxonn
kel’lem tem, hanvem pollelem.
Hea mahan mon’xak mellunk kallchea Munglarak disa,
mhaka ek vhodd ani kherit bhagia zalem. Village Inn
Restaurant-achea darvorteamxim Shri Anthony
Corriea-Pienkar-an (Adim, oHeraldo disaleche Konknni
panache sompadpi, adle Uzvadd disaleache sub-editor
toxench Gulab masikache Kharbari asle) mhoji vollok
Bab Brazinho-ank dili. Brazinho baban, mhojea
nanvacheruch mhaka vollkollo ani mhojim borovpam
V.Ixtt-ar, Gulab-ar, The Goan Review adi, adi. tust
korpa sarkelim asat mhonn, hea mahan borovpean
sangonam fuddem, mhojem dhadoslem. Borovpeanchi vollok
sahiti (literature) velean zata. Ami eka-kekak borovpa
velean khub adim savn vollkotale. Hem amchem poilem
mellop zalem.

Ami tegui-i vosreant bhitor sorle. Punn, ghora
koddsun vosreant ieunk hanv bhair sortanam jem hanvem
kitem chintlelem tem mat mhojem soponuch kochem
tharlem. Kuwait-an, tiatristanchem bhirem asa tea
pormonnem “Tiatr Dis” sorombhak Village Inn vosreant
paim ghalunk svat aschinam oxem hanvem sumar kadlolo.
Ghoddie sodam porim susegad Goenkar late pavtolo oxem
hanvem odmas kelo. Jedna, Kuwait Igorjiche Padri
Vigar, Padri Melwyn D’Cunha hannem “Konknni Opariancho
Jhelo” pustokachi ugttavnni keli tedna hanvem, mhaka
soit 34 lok hajir aslele mezun kaddle. Ani xevott
meren to ankddo hallunk nam.

Jr. Rod-an, aplea bapaik Minguel Rod-ak Goenchea
sorkaran azun bhovmann diunk nam mhonn nixedh marun
‘Kala Academy’-chea sorombhak hajir zaunk nam, zalear
Kuwait-cho ekloi famad tiatristist KGTS-an ghoddun
haddlollea sorombak hajir kiteak naslo? Tancho koslo
nixedh kai? Vo amontron diunk na? 32 odik KGTS
sonvstheche vangddi asat. Fokot 11 vangddi vosrean
disle.

Joe bab, khoreanich ho gombhir vixei mhojea
manarojean vachpan ‘Aitarechea Kaskutleo’ hatunt
gheunk mhaka khuxi nasli . Jedna tunvem Kala Academy-n
zal’lem Goenchem chitr tujea borovpan amchea nodrek
haddlem tedna, mhaka-i dislem hangasorlem vo
Kuwait-chem vathoronn tujea nodrek haddunk. Khorem
mhonnlear thodde Goenkar crab mentality sarkele. Vhoir
sorteleak voir sorunk dinant. KGTS-achi novi vavurpi
somiti nirmann zaleleak, borea magpeanchea adharan
khup sudharnnim kelea ani korunk sodtat, punn jextt
(senior) tiatrist ani thodde KGTS vangddi, tankam
khala udounk tozvit kortat mhonn, Abrilache 17ver 2007
Village Inn Restaurant-an dolle bhor disun ailam.

Brazinho baban ‘Goenche Kala Academy’-cho, aplea
jinnentlo vhoddantlo vhodd sotkar chukoun Kuwait-an
aplea poilea (pordesan) pustokachi ugttavnni korunk
ailolo. Aple khas dolleanim tannem pollelem Goenkarank
kitlo porian sahiticho mog asa poi to. To ek
sahitikar-uch nhoi punn ek okhondd tiatrist. Konknni
rong-machier fuddle pillgek urta toslo vavr kela
Tiatistam khatir tannem khubuch girest daiz samballun
dovorlelem asa. Ani hea mahan borovpeachi ani
kolakarachi ekdom durboll poristhitin pustokachi
ugtavnni polloun, borea magpeank khub vaitt dislem ani
hajir asleleanim aplo xinn porgotailo.

Mogan mog dium-ia,

Lino B. Dourado


Click on this link to read the following article by
JoeGoaUk


http://us.f564.mail.yahoo.com/ym/ShowLetter?MsgId=7980_47115178_61008_3728_4481_0_240508_17320_2002681128&Idx=0&YY=76342&y5beta=yes&y5beta=yes&inc=25&order=down&sort=date&pos=0&view=a&head=b&box=Inbox



http://us.f564.mail.yahoo.com/ym/ShowLetter?MsgId=8394_60042675_69307_2986_2261_0_240583_4316_2186252349&Idx=0&YY=2496&y5beta=yes&y5beta=yes&inc=25&order=down&sort=date&pos=0&view=a&head=b&box=Inbox


http://www.goa-world.com/goa/poems
http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado


21/4/2007