Monday, January 26, 2009

Montreanchea Hatantlean Puroskar Vanttche Nhoi

Montreanchea Hatantlean Puroskar Vanttche Nhoi


Vorsachea vorsa Gulab Puroskar vanttpant ietat. Hevui
vorsak Gulab Puroskar - 2004 jikhpeank bhettovpant
aile. Gelea vorsak, Gulab Puroskar-2003 dobajeak
Moddganvchea Gomantt Vidya Niketan vosreant hanv hajir aslom.

Kaim zonn ho Gulab Puroskar Mumbointlea Filmfare
Award-sam kodden sor kortat. Sorgest Fr. Freddy-n
utt’tejon divpa sarkelo vaur chalu kelolo to fuddarak
chalu uronk mhoje anvdde ani otreg.

Punn ek mhaka somzona. Ani konnem tori hache voir
niall kela zalear tivui mhaka khobor na. Ami,
Mumbointlea Bollywood vividh puroskar zoxe porim
Screen, Filmfare, adi. TV-ir polletat, ani toxench
Hollywood Oscar awards. Hea ghonghonit dobhajeank
hanvem keddnach politicians manache soire koxe hajir
aslele polleunk nant, ani nhoi mhonn tanchea
hatantlean jiknnarank puroskar vanttpant aile nant.
Fokot tancheach mon’xeam koddlean (film industries
personalities) puroskar vanttpant ietat.

Zalear, Gulab Puroskar rajkarnni nastana vanttpant
kiteak ienant?

Ghelea vorsak Gulab Puroskar vanttpant ailo tedna
BJP-cho sorkar aslo. Gulab Puroskar dobajeak kaim
Montri ani amdar manachi kodel ghevn boslele. Puroskar
jiknnaramni, odik korun tiatristanim, sorkar Konknni
ani tiatristam katir kainch korina mhunn machier thavn
ttika keleli. Suvallek hajir aslelea montrean maik
hatant ghetoch sodam porim fottaxeo marleleo.

”Tumche vichar hanvem nond keleat ani mhojea sorkarak
hache voir vichar korun mhojea lagim ghoddtta titloi
hanv adhar kortolom” Tallio. ..Hevui vorsak oxench
kitem tori ghoddlem astelem..Montreanim
fottingponnacho pavs votlo astolo ani prekxokamnim
tallio pettoileo asteleo.

‘Ut’tom Romi Konknni Borovpi’ Gulab Puroskar 2002
Utodd’ddeche adle Vigar, Padre Jose Dias-ak (atam
Kutt’tthale igorjent vavurtat) favo zal’lo. To amchea
igorjent astana, amchem modlem natem kuttumbik
torechem aslem. Amchem ghor igorjek tenkun aslelean
rikami vellar ami dogui rajkarannachea gozalincher
bhasabhas kortale. Tachea koddlean hanv khub xiklam
ani tachea kallzantle vichar pasun somzolam

punn

Boro Borovpi mhonn Konknnicho mog naslelea adlea
Mukhel Montreachea hatantlean Gulab Puroskar 2002
khuxe bhair svikar korcho poddlo. (Polle fottu Gulab
masik Agost 2003, bhailea pannar)

Padri Jose Dias-ache Gulab-ar ietlo dor ek lekh hanv
mon divn vachtam. Aple likhnnen favo tea vellar tannem
sorkarachim motlobiponnam vachpeanchea nodrek
haddleant. Halich Junachea Gulab ankar jea mon’xeachea
hatantlean Puroskar ghetlolo taka pasun tannem soddlo
nam. IFFI-che nanvan Parrikaran choddan chodd
duddvancho ibadd kela mhonn tannem spoxtt korun
dakhoilam. Anik konnui zal’lo zalear Parrikarachea
hatantlean Puroskar ghetlolo mhonn ogo ravtolo aslo,
punn Padri Jose Dias sotak soddanch fuddo kela, ani
akhach lagun Konkan Railvechea chollvolint tannem
pulisancho latthi-mar pasun kala.

Voili gozal hanv kiteak kortam?

Agost 2005 Gulab mhojea hatant poddlo. Modlea don
panar Fr. Freddy J da Costa Iadiostik Gulab
Puroskarache fotu pollele. Barik nodren te pollevn
ghetle ani mhojem mot Gulab vachpea somor ghalin
dislem.

Hea vorsant Gulab Puroskar vanttpant bodol disla. Adle
porim broxttachar ani mhelle rajkarnni hatantleant
Puroskar vanttpant aile nant. Fr Casmiro Ut’tom’
Konknni borovpi Gulab Puroskar 2004 Kokoy-ak ani Rio
Rosa Fr. Moreno-k Goan Review-cho “Man of the Year’
ani ier choddxe puroskar Goeanche promannink maha
veoktim koddlean bhettoitana fotuvancher distat.
Konnem tori hem pavl ghetlam tem khub xanneponnachem
asa. Ani fuddarak oxech toren cholchem mhunn mhoji
opekxea

Kiteak, Goeamche montreamni Konknni khatir kainch
kelem nam ani fuddarak korchenant. Ghelea vorsa IFFI
somoiar Parrikaran 21 lak rupianchi dan “Shwas”
Marathi filmak dilelem. ‘Aleesha ani Sood’ hea
donantlea ekai Konknni filmak duddvacho adhar korunk
nam. Punn tantlem ek film ‘Aleesha’ National Film
Award jikhun ek nibor thapott Parrikara oslea
anti-Konkani mon’xeancher vazoil’lea porim zalam.

Xevottachem sangpachem mhollear, fuddarak Gulab
Puroskar Somitin mothvache puroskar asat te
montri-amdaranchea hatantlean diunche nhoi ani
puroskar svikar korteleank opman korcho nhoi..

Lino B. Dourado
(Utodd’ddekar-Kuwait)

'Gulab' Setembr 2005

http://www.goa-world.com/goa/poems
http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado

No comments:

Post a Comment